ليه JavaScript هي لغة الويب الأساسية وإزاي تطورت؟

لو فتحت أي موقع على الإنترنت، سواء فيسبوك، يوتيوب، أو حتى جوجل، فأنت بتتعامل مع JavaScript بشكل مباشر أو غير مباشر. طب ليه؟ لأن JavaScript هي اللغة اللي بتخلي المواقع تفاعلية مش مجرد صفحات ثابتة زي زمان.

في المحاضرة دي، هنتكلم عن:

✅ ليه JavaScript بقت اللغة الأساسية للويب؟

✅ بدايتها كانت إزاي واتطورت على مدار السنين؟

✅ ليه بقت من أكتر اللغات انتشارا حتى خارج الويب؟

🔵 القصة من الأول

في سنة 1995 كان الإنترنت في بداياته والمواقع وقتها كانت مجرد نصوص وصور ثابتة مفيش أي تفاعل حقيقي زي اللي بنشوفه دلوقتي. هنا قررت شركة Netscape اللي كانت مسيطرة على المتصفحات وقتها إنها تطور لغة جديدة تضيف تفاعل للمواقع فجابوا واحد اسمه Brendan Eich وقالوله: “معاك 10 أيام تعملنا لغة برمجة جديدة“

اي ده!!!! يعني اللغه اللي مطلعه عينينا دي اتعلمت في 10 ايام اصلا؟ 😂 😂

وفعلا يا صديقي Brendan اشتغل وطلع بحاجة اسمها LiveScript بس بعدين غيروا اسمها لـ JavaScript عشان التسويق واستغلال شهرة Java وقتها (رغم إن مفيش بينهم علاقة أصلا 😅).

🟠 إزاي JavaScript سيطرت على الويب؟

بعد ما JavaScript ظهرت بدأت الشركات تاخد بالها إنها فعلا إضافة قوية للويب لكن كانت لسه محدودة جدا. ومع الوقت حصلت تطورات كبيرة خليتها تسيطر تماما على الإنترنت:

• ظهور AJAX (2005):

  دي كانت نقلة جبارة لأنها سمحت للمواقع إنها تجيب بيانات من السيرفر بدون ما تعمل Reload للصفحة وده اللي خلى مواقع زي Gmail وFacebook تشتغل بسلاسة.

• ظهور مكتبات وإطارات عمل قوية:

  حاجات زي jQuery في 2006 سهلت كتابة JavaScript وبعدها بدأت الإطارات الكبيرة زي Angular, React, Vue، واللي غيرت شكل التطوير تماما.

• دخول JavaScript لعالم السيرفر:

  في 2009 ظهر Node.js وده فتح باب جديد تماما لأن JavaScript كانت دايما محصورة في المتصفح لكن دلوقتي بقت تشتغل على السيرفر برضو وده خلاها لغة كاملة تقدر تبني بيها Backend وFrontend مع بعض.

• تطور المتصفحات ودعم ES6:

  في 2015 حصل تحديث كبير في اللغة اسمه ES6 أضاف مميزات رهيبة زي let & const, Arrow Functions, Classes, Promises وده خلى اللغة أسهل وأقوى للمطورين.

🟢 طيب ليه JavaScript مش مجرد لغة ويب دلوقتي؟

مع التطورات اللي حصلت JavaScript خرجت بره عالم الويب وبدأت تدخل في مجالات تانية زي:

✅ تطبيقات الموبايل: بإطارات زي React Native وIonic

✅ الذكاء الاصطناعي والتعلم الآلي: باستخدام TensorFlow.js

✅ الألعاب: عن طريق محركات زي Phaser

✅ تطبيقات سطح المكتب: باستخدام Electron

💬 السؤال ليك بقى: إيه رأيك في تاريخ JavaScript؟ وهل شايف إن هي فعلا تستحق تكون لغة الويب الأولى؟ شاركني رأيك في الكومنتات.